काठमाडौं । लामो समयदेखि प्रभावित सिन्धुपाल्चोकको ऐतिहासिक तातोपानी नाका पूर्ण क्षमतामा सञ्चालनमा ल्याउन प्रतिनिधिसभा सदस्य भरत पराजुलीले कूटनीतिक पहल तीव्र बनाएका छन् ।
यसैक्रममा सांसद पराजुलीले मंगलबार काठमाडौंमा चीनका लागि नवनियुक्त नेपाली राजदूत डा. कल्याणराज शर्मासँग भेटवार्ता गरेका छन् । भेटमा सिन्धुपाल्चोकको आर्थिक तथा व्यापारिक जीवनसँग प्रत्यक्ष जोडिएको तातोपानी नाकालाई सहज र पूर्ण क्षमतामा सञ्चालन गर्ने विषयमा गम्भीर छलफल भएको पराजुलीले जानकारी दिएका छन् ।
छलफलका क्रममा नाकाबाट हुने व्यापारिक गतिविधि विस्तार गर्ने, स्थानीय नागरिकको आवतजावतलाई सहज र व्यवस्थित बनाउने विषयसमेत उठाइएको थियो । जवाफमा राजदूत शर्माले तातोपानी नाका सञ्चालनका लागि आफ्नो तर्फबाट सक्दो पहल गर्ने प्रतिबद्धता व्यक्त गरेका छन् ।
तातोपानी नाका सञ्चालनलाई प्राथमिकतामा राख्दै आएका सांसद पराजुलीले यसअघि सोमबार काठमाडौंमा सम्बन्धित सरोकारवाला निकायसँग सर्वपक्षीय छलफलसमेत गरेका थिए ।नाका पूर्ण रूपमा सञ्चालनमा आए सिन्धुपाल्चोकसहित देशकै व्यापार, पर्यटन र स्थानीय अर्थतन्त्रमा सकारात्मक प्रभाव पर्ने अपेक्षा गरिएको छ ।













